KIA Masat (1) Dap Ba, Masat (4) Dap dung ginra Zup Mai Yang maga de April (26) ya shani Myen hpyen hpung ni htu shadut htim gasat wa ai majaw N Jang Yang, Pung Swi Yang mare mung mare masha (1000) mi daram hprawng yen wa nna ya aten hta Tang Hpre RC nawku jawng wang, Myitkyina Trinity nawku jawng kaw du nga sai rai nna April (27) ya shani hta mung majan matut manoi naw byin nga ai a majaw Mung mare masha (1000) daram naw chyat rawng nga ai lam chye lu ai.
Mare hkan ngam nga ai mung mare masha ni hpe PCG hte, Nawku hpung ni kawn Gwi Htau kaw wa tau la nga ai hta Myen Hpyen Dap ni kawn num, ma ni hpe gaw Gwi Htau hka kaw rap lai mu ngu tsun nna la wa ngan ni hpe gaw jahkring da ai lam nga ai hte ndai kaw sha nga mu anhte malu masha ni jaw sha na ngu tsun nna pat hkum da nga ai lam Shara Hka Li tsun ai kaw na chye lu ai.
Ya na zawn pat hkum da ai a majaw PCG hte, Nawku hpung ni kawn mare masha ni hpe shalai ya na matu Asuya de jahkrup bawngban nga ai lam hpe mung chye lu ai.
Tang Hpre RC nawku janwg hte Trinity nawku jawng wang de du nga sai Mung mare masha ni hta asak kaba sai dinggai dingla ni machyi makaw law nga ai lam hpe mung chye lu ai.
