Kamai mare up hkang salang hte rau hpung magam gun kanu kawa ni sa ya ai malu masha ni April (25) ya shani Lai Nawng Hku mare de du sai lam chye lu ai.
Lai Nawng Hku mare de hpung kanu kawa ni sa ya ai n-gu buk (59), sau, jum majap, shakau, sola, battery, inverter, sut hte bu hpun palawng ni du wa sai lam na chye lu ai.
Myen Hpyen Dap kawn hkang zing da ai Lai Nanwg Hku mare masha ni gaw lai wa sai n htoi (5) ram kaw nna shanhte gun sa ai malu masha ni ma taw nga sai re majaw Kamai mare up hkang salang hte rau hpung magam gun kanu kawa ni malu masha sa sa ai raitim April (23) ya shani hkali jawn na shara kaw pat hkum da hkrum ai majaw Lawa mare makau kaw sha sa da lu nna bai nhtang wa mat ra ai re hpe chye lu ai.
Mare masha ni gaw myo hkan de wa mayu sai ngu tsun yang Myen hpyen hpung ni kawn lahta kaw na ahkang njaw shi ai nmai wa shi ai ngu tsun ai lam buga masha ni shana wa ai.
Mare salang ni, buga na myit su kanu kawa ni hte nawku hpung ni kawn Kamai Byuhar Hmu hte Jinghpaw Mung asuya de Lai Nawng Hku hpyen yen masha ni hpe sa woi la na matu laika tang shawn da ai raitim ya ten du hkra ahkang njaw shi ai lam chye lu ai.
www.kachinnet.net
