Dingdung Daw Rudi Amyu Sha Laknak Lang Rawt Malan Hpung (7) kaw nna hpaw shabawn da ai Munghpawm Mung masa bawngban jahkrup Komiti FPNCC hku nna gaw, (4) lang ngu na Tsa Ban (21) Pang Lung Zuphpawng n lu shang lawm ai lam August (13) ya shani ndau laika shapraw da ai hpe chye lu ai.
Tsa Ban (21) Pang Lung Zuphpawng n sa na lam hte seng nna, Wa Mung UWSP ginjaw ginra Pang Hkam kaw galaw ai zuphpawng hta daw dan ai re hpe chye lu ai. FPNCC a ndau laika hta ndai kalang na hpawng gaw Covid-19 kap bra ana byin hkrum ai aten re majaw Jarit mayan ginra ni hta Covid-19 ana makawp maga na matu yakhkak ai sha n ga hkawm sa hkawm wa hkrun lam mung yak hkak ai majaw mali lang ngu na Tsa ban (21) pang lung zuphpawng de nlu shang lawm ai re lam, ya na zawn Uhpung (6) hpe asuya kawn saw shaga wa ai hpe grai kabu ai lam hte Mali lang na tsa Ban (21) Pang Lung zuphpawng hpe FPNCC kawn mung grai arawng la ai lam n dau laika hta shalawm da ai re.
(4) lang ngu na tsa ban (21) Pang lung zuphpawng hta NCA lakmat nhtu da ai dingdung daw na laknak lang rawt malan Uhpung (6) hpe saw shaga da ai raitim, ULA/AA ni hpe shangam da ai majaw FPNCC hku na grai myit n pyaw ai lam, gasat gala manghkang byin nga ai ginra na rawt malan Hpu nau ni yawng shang lawm ai hte bawng ban jahkrup lu yang she shada myit makam ni jat wa nna Simsa lam bungli masing ni hpe hkrang shapraw galaw lu na re lam FPNCC kawn tsun n dau da ai hpe chye lu ai.
