Myitkyina hte Waimaw kaw nga ai Jinghpaw wunpawng amyu sha ni kawn Muklum kata lamhkawm n-gun madun ai lam hpe April (30) ya shani kawn May (13) ya shani du hkra ninghtoi (14) ya galaw sa wa na lam chye lu ai.
Lam hkawm N-gun madun ai a yaw shada lam gaw April shata (11) ya shani kawn dai ni du hkra majan lapran pat shingdang hkrum ai mung shawa ni lawt pru wa lu na matu, pat shingdang hkrum ai mungshawa ni wanglu wanglang shinggyim nau na garum ningtum lu na matu, Myen Mung Asuya Gumsan Magam Min Awngg Lai hte Hpawmi Awng San Su Kyi hpang de laika bang ai raitim hpa htang shana wa ai lam n nga ai hte Jinghpaw mung Hkringmang Dr. Hkyet Awng hte mung lang hte lang hkrum shaga yu sai raitim laklai ai lam n nga ai a majaw re nga nna Sara num Nang Pu kawn tsun ai.
Lamang hpe shabyin shatai Komati kawn woi awn nna dai Komati hta kachin CSO, wunpawng amyu sha zinlum hpung, makam masham nawku hpung shagu na magam gun ni hte hpaw shabawn da ai lam chye lu ai. Ramma n-gun madun dabang hpe gaw Hta.1 shawng na Andaw Shin makau kaw hpaw da ai re, dai hta buga shagu na ramma ni, htunghkying na ramma ni, IDP na ramma ni, ramma yawng (300) jan hte shani shana ninghtoi (14) ya tup n gun madun sa wa na rai nna laklai ai lam n nga ai rai yang matut nna laga ladat ni hte bai galaw sa wa na re lam Sara num kawn matut tsun ai.
N-gun madun ai lamang hta shawa masha yawng (5000) ja shang lawm nna galaw nga ai lam Myu Sha Pyen U shiga jaw la ai kawn chye lu ai.
