KIO Ningbaw kaba Du Daju Jum Nban La woi awn ai KIO Ginjaw Komiti Salang ni hte Myen hpyendap Dap Up Daju Min Aung Hlaing a laksan dat kasa ဒုတိယဗိုလ္ခ်ဳပ္ႀကီး ထြန္းထြန္းေႏွာင္ woi awn ai hpung ni 2018 ning, February shata (1) ya shani Miwa Gumsan Mungdan, Yunan Mungdaw, Dali mare kaba kaw hkrumzup ai lam galaw lai wa sai re lam na chye lu ai.
Dai zuphpawng gaw KIO hte Myen hpyendap ni ya byin nga ai majan shazim na hte simsa lam bawngban ai hta amyusha rawt malan hpung yawng shanglawm nna Panglung ga sadi hte maren federal munghpawm gawgap lam bawngban ai hpawng re lam chye lu ai.
KIO Ningbaw kaba Du Daju Jum Nban La zuphpawng hpaw hkalum ga shaga ai hta “Ngai KIO ningbaw lit hpe hkapla ai hpang, shawng nnan lang hkrumzup lu ai majaw kabu arawng la nngai. Anhte laknak lang rawt malan nga ai gaw (57) ni hpring na matu 3,4 ya sha ra sai re. KIO gaw Simsa lam hpe ra sharawng ai majaw lai wa sai Myen Asuya ban hte ban gap hkat jahkring ta masat htu nna bawngban jahkrup sai raitim teng man ai simsa lam hpe n lu ai majaw ya na zawn hpyen majan ni bai byin wa ai lam re. KIO gaw simsa lam hpe n ra sharawng ai majaw laknak lang rawt malan nga ai n re” nga nna hpawng hpaw mungga hta tsun da ai.
Tengman ai simsa lam lu na matu ahkyak dik htum gaw Myen mung kata nga ai amyusha laknak lang rawt malan wuhpung ni yawng shanglawm bawngban yang she mai byin ai re. Amyusha laknak lang rawt malan hpung ni yawng n shanglawm ai sha gara hku mung tengman ai simsa lam n mai lu ai ngu mu mada hkamla ai lam matut tsun ai.
Dai hpang ဒုတိယဗိုလ္ခ်ဳပ္ႀကီး ထြန္းထြန္းေႏွာင္ bawngban ai hta “ndai lang na zuphpawng gaw hpyen majan hte seng nna shada bawngban na matu yaw shada ai re. Ndai lang hta myithkrum lam lama mi lu na re ngu gaw n myit mada ai raitim tengman ai simsa lam lu na hpe ra ai rai jang lahkawng maga shada atsam dat hkrang shapraw yang gaw teng sha lu la na re ngu myit mada ai. တပ္မေတာ္ hku nna gaw ဒို႔တာဝန္အေရး(၃)ပါး hte ျငိမ္းခ်မ္းေရးမူဝါဒ(၆)ခ်က္ hpe madung tawn nna galaw sa wa yang simsa lam gaw teng sha lu na re ngu kamhpa nga ai re.
Ya ten anhte hkawm sa nga ai masa gaw Democracy Federal munghpawm hpe ningpawt tawn ai masa re, dai masa awngdang wa hkra တပ္မေတာ္ hta lit nga ai. Munghpawm kaw na ga garan pru wa mai ai masa hpe n hkap la lu ai. Munghkawm masa confederation hpe tsepkawp n hkap la lu na re, ga garan pru na ahkang n nga ai, federal munghpawm hkrang hte maren bawngban sa wa ga” nga nna tang madun ai lam chye lu ai.
2008 gawda ai tara hta ra rawng ai lam nga na re, gram sharai na hpe တပ္မေတာ္ ni jumtek da ai n re, lam masa ang ai hku shawa myithkrum ai masa hte gram sharai mai ai sha re, Democracy lai masa hpe ngangkang ai hku jai lang lu ai shani တပ္မေတာ္ gaw yen ya na sha re nga tsun ai. Myen hpyendap hku nna gaw amyusha rawt malan wuhpung nkau hpe n hkap la ai lam, KIO a uphkang ginra hta nga ai kaga laknak lang rawt malan hpung ni hpe mung n mai hkap la da ai lam ဒုတိယဗိုလ္ခ်ဳပ္ႀကီး ထြန္းထြန္းေႏွာင္ tsun ai.
UWSA hku nna mung NCA mahkrun hku n sa ai sha kaga lam hku sa na ngu ai hpe gaw tsep kawp n hkap la ai lam hte ra wa yang ra ai hku Myen hpyendap maga gaw galaw ang ai lam ni hpe galaw sa wa na sha re nga nna Lat Du Daju Jum Htun Htun Naung matut tsun da ai.
Amyusha laknak lang rawt malan wuhpung ni yawng n shang lawm ai sha KIO gaw NCA kaw ta masat htu n mai ai lam, dai sha n-ga laknak lang rawt malan hpung ni yawng n shanglawm ai gaw tengman ai simsa lam lu na matu gaw n mai byin ai. Ya aten KIO sha n-ga, amyusha laknak lang rawt malan hpung ni yawng hpyi shawn nga ai gaw teng man ai Federal munghpawm mungdan gawgap ga ngu hpyi shawn nga ai re. Raitim myen asuya hte myen hpyendap gaw ya aten du hkra mahtai jaw ai lam n nga shi ai nga nna KIO Ningbaw Malai – I Du Daju Sumlut Gun Maw tsun da ai.
NCA mahkrun hta yawng n mai shanglawm ai rai yang amyusha laknak lang rawt malan hpung ni yawng mai shanglawm ai mahkrun langai bai tam ra na re nga nna Du Daju Sumlut Gun Maw tsun ai hpe chye lu ai.
Ya byin nga ai majan ni hte seng nna bawngban ai hta KIO gaw, htim gasat majan hpaw ai lam n galaw ai. Myen hpyendap kaw nna KIA hpyenhpung ni nga ai shara de htim shang wa ai majaw byin ai majan she re nga nna KIO Ningbaw kaba Nban La tsun ai lam chye lu ai.
Ya byin nga majan ni hpe lawan ai hku shazim kau nna Hpyen yen mung shawa ni hpe sari shadang nga nga hte tinang buga de bai nhtang wa lu na matu seng ang ai Nawku makam masham hpung, NGOs ni hte jahkrup sa wa na re nga nna lahkawng maga bawngban sai lam chye lu ai.
Laiwa sai 2013 ning, Myitkyina kaw galaw ai hkrumzup bawngban hpawng hta mung gasat gala majan n nga mat ai madang du hkra shayawm kau na matu ngu myit mada nna lahkawng maga myithkrum ai hte ta masat htu ai raitim ta masat htu ngut ai hpang majan ni gaw grau laja lana byin wa ai re hpe chye lu ai.
ဒုတိယဗိုလ္ခ်ဳပ္ႀကီး ထြန္းထြန္းေႏွာင္ tang madun bawngban ai KIA Dapba (1,2,3,5) hpe sha masat masa galaw nna ngam ai Dapba ni hpe n hkap la ai lam hte Dap shara jahkrat masat na lam gaw garai n mai byin na re. Dung (14) dap shara yen ra na ngu ai mung mai byin na lam n nga ai, nhprang sut rai makawp maga na gaw KIO hta mung lit nga ai re majaw, တပ္မေတာ္ hte KIO shada chye na hkat ai lam lu la jang majan gaw zim wa mai na sha re nga nna Ningbaw malai-I Dkb. Gun Maw tsun bawngban ai re hpe chye lu ai.
Dai lam hte seng nna lang hte lang hkrumzup bawngban jahkrup la hkat ra na re, KIO hku nna mung sung sung li li myit jinghkum nna mahtai bai jaw na hpe တပ္မေတာ္ gaw myit mada la nga ga ai nga, ဒုတိယဗိုလ္ခ်ဳပ္ႀကီး ထြန္းထြန္းေႏွာင္ tsun ai hpe mung matut chye lu ai.
KIO Ningbaw kaba hku nna ဗိုလ္ခ်ဳပ္ႀကီး nang mung dingdung daw a hpyenman hpe lit la ai wa re majaw ya ten htim gasat nga ai gasat gala lam hpe dawm jahkring kau ai rai yang, mawdaw lam de du nga ai KIA hpyen hpung ni hpe dawm la na re ngu, myithkrum lam lu da ai rai yang akyu nga na re lam mu mada bawngban ai raitim myithkrum ga sadi tawn ndau shabra n ra na re lam ဒုတိယဗိုလ္ခ်ဳပ္ႀကီး ထြန္းထြန္းေႏွာင္ htang bawngban ai lam chye lu ai.
Ya na zawn KIO Ningbaw kaba woi-awn ai Ginjaw Komiti Salang ni hte ဒုတိယဗိုလ္ခ်ဳပ္ႀကီး ထြန္းထြန္းေႏွာင္ woi-awn ai Myen hpyendap dat kasa ni bawngban ai hta matut nna lang hte lang bai hkrumzup bawngban jahkrup la ra na re nga nna lahkawng maga bawngban da ai lam chye lu ai.
Dai zuphpawng hta KIO Ningbaw kaba Du Daju Jum Nban La woi awn ai, Ginjaw Komiti Salang ni shang lawm nna, Myen hpyendap maga na gaw ဒုတိယဗိုလ္ခ်ဳပ္ႀကီး ထြန္းထြန္းေႏွာင္၊ ဗိုလ္ခ်ဳပ္ သန္းထြဋ္သိန္း၊ ဗိုလ္မွဴးႀကီး မ်ိဳးမင္း၊ ဗိိုလ္မွဴးႀကီး ေက်ာ္စိုးဝင္း၊ ဗိုလ္မွဴးႀကီး ဝင္းထြဋ္လတ္ ni shanglawm ai rai nna Miwa Gumsan Mungdan a Asia hte seng ai laksan dat kasa salang kaw nna lam tam garum la ai majaw byin tai wa ai zuphpawng re lam chye lu ai.
