Mungkan Ka-ni Nanghpam lusha ai lam hte Tara N-shang Dut Ginlen ai lam Ninghkap Nhtoi hta shabra da ai KIO Ginjaw Ka-ni Nanghpam Pat Jasan Komiti a sumtang laika hta UNODC sumtang hta madun da ai Jinghpaw Mung kata Ka-ni hkai ai shadawn shadang hta htam lahkawng rai nna, yawng gaw Myen Hpyen dap uphkang ai gaiwang kata kaw hkrai re lam htawng madun dat ai.
KIO gaw 2018-2019 Ka-ni hkai ladaw laman, Jinghpaw mung hte Sam Mung dingdung daw, Ginra 19 hta sawk hkaja hpung ni dat nna sawk hkaja ai hta Jinghpaw mung kata Ka-ni hkai ai gaw hectare 6,918.23 hpe sawk sagawn lu ai. Dai gaw UNODC a 2018 ning na Myenmung Ka-ni Sawk maram laika hta madun da ai hectare 3,400 a htam lahkawng jan rai nga ai. UNODC ni n-lu sawk maram da ai Jinghpaw mung Putao hte Sumprabum ginra ni hta mung Ka-ni hkai ai shara nkau hpe tam sawk da ma ai.
Ndai mu sawk ai malu ni hpe lamu ga sumla, photo sumla ni hte shingdep shingnan da ai re majaw, UNODC ni madi madun da ai Jinghpaw mung hte Myen mung ting hta Ka-ni hkai shapraw ai lam yawm wa sai ngu ai ga hpe nau n-mai kam na zawn byin shangun ai.
KIO gaw Sam mung dingdung daw na sawk hkaja shang lu ai ginwang manga kata hta Ka-ni yi 3,192.4 hectare hpe tam sawk da lu ma ai. Dai ginra hta mung Jinghpaw mung hte maren Myen hpyen dap, shanhte a BGF, hte Pyi-tu-sit hpyen hpung ni uphkang ai gaiwang kata ni hta hkrai rai nga ai. Ndai lam nan mung, UNODC ni tsun da ai Ka-ni hkai ai madang law dik ginra gaw KIO hte kaga bawsang rawt malan hpung ni a ginra ni hta re nga ai lam hte shai taw nga ai.
Kani hpraw hte Yama galaw shapraw ai jak rung ni law malawng gaw Sammung dingdung daw Myen hpyen dap ni jumtek matsun nga ai Pyi-tu-sit ni a gaiwang kata hta rai nga ai. Jak rung madu gaw Miwa mung masha ni rai nna Myen mung kata na shimlam hpung ni a makawp maga da ai shimlam la ya nna, shanhte hpe hkanse, mayun kumhpa ni jaw nna galaw ai rai ma ai.
KIO gaw Myen hpyen dap hpe tara n-shang ai Ka-ni nanghpam bungli ni hpe makawp maga taw nga ai lam hpe jahkring kau na matu, hte Myen asuya hpe mung nanghpam hte seng nna masan sa ai hku tara shakang lu na matu, tsang madang shagu hta sake manawn sha ai lam ni hpe shamyit kau ai zawn re ai, lit la galaw sa wa na matu shadut da ai.
KIO gaw UNODC hte kaga mungsang wuhpung wuhpawng ni hpe mung Myen mung kata na nanghpam manghkang ni hpe grau tang du hkra sawk hkaja na hte dai manghkang ni hpe shaprai hparan kau lu hkra Myenmung hpe mung kanawng lawm na matu shadut da tai.
KIO Kani Nanghpam Patjasan Komiti hpe 1993 ning hta hpaw ninghtan da ai rai nna, Ka-ni nanghpam shamyit shatsai ai magam bungli ni, dut mari masha ni hpe ahkyak la sharin shaga ai lam, nanghpam lusha ai ni hpe dawn jasan ya ai bungli ni hpe, KIO uphkang ginra hta htep lahti n’gun dat galaw sa wa nga ai.
Sumtang hkum dingnum hpe lawu de na link kaw mai hti ai: (Ka-ni Nanghpam Mabyin Lam Sawk Sagawn Sumtang PDF)
Matut mahkai na masha: Ph; +86 15969236886, Email;- ginjaw_patjasan@yahoo.com
