Jinghpaw Mung kata Myen Hpyen Dap kawn htu shadut Majan baw ai majaw Myitkyina de du shang wa ai Njang Yang makau grup yin na hpyen yen Mung shawa ni gaw May 26 ya shani tinang buga dum nta de bai wa na re lam Myitkyina ginwang Up hkang Salang Hkawng La di kawn tsun ai re hpe na chye lu ai.
N Jang Yang makau grup yin na hpyen yen Mung shwa ni gaw buga de wa nna yi sun hkau na galaw sha mayu sai lam laika tang shawn wa ai majaw ginwang na lit nga ai Salang ni hte Rapdaw dat kasa Salang ni shimlam hpung ni jawm bawng ban ai hta wa shangun na matu myit hkrum sai re lam Ginwang uphkang salang wa matut tsun ai hpe chye lu ai.
Danai Awng Lawt mayan hta gaw Myen hpyen hpung ni grai naw shamu shamawt nga ai majaw mung mare masha ni tinang mare buga de n-gwi wa shi ai rai nna ya aten Danai kaw nga ai hpyen yen mung shawa ni wanglu wang lang nga lu na matu Danai myo kaw tara shang hpyen yen dabang hpaw ya na matu Mung danai dat kasa Salang ni kaw nna May 22 ya shani Myen Asuya lahta tsang rapdaw de laika tang shawn da ai re hpe mung matut chye lu ai.
