Majan a lapran Chyat rawng nga ai hpyen yen mungshawa ni lawt wa lu na matu n gun madun hpyi shawn ai hta woi awn ai Sr/n marai (3) hpe myen Asuya tara rung kawn ntara ai hku amu daw dan ai lam hpe nra sharawng ai majaw Ramma hte seng ai uhpawng uhpawng ni, CSO ni, kanu kawa mung shawa ni makam masham hpung shagu na hpung woi ni kawn Komiti hpaw let woi awn galaw ai n’gun madun lamang hpe Myitkyina manau wang kaw Hkying 9:00 Aten hta Akyu hpyi la ai hpang lam hkawm n’gun madun ai lamang galaw ai re hpe chye lu ai.
Mungshawa n’gun madun lamang hte sengnna Rev Dr. Hka Lam Sam Sun kawn shatsam mungga tsun ai hta teng man ai lam hpe galaw nga ai ramam masum hpe tara rung kawn n tara ai hku tara dawdan ai lam hpe anhte gaw hkrit nna htingnut mat na lam n nga ai nga nna tsun ai.
mungshawa n’gun madun ai lamang galaw ai a marang e Htawng hkrat hkrum ai Sr/n masum ni kalang ta lawt na n lawt na ngu gaw ahkaw ahkang lu ai ni a lata kaw she re, raitim n tara ai hku tara dawdan ai lam hpe gaw zim rai na n mai nga ai, n tara ai lam hpe mungkan kawn mung mu mada chye lu na matu galaw ai re lam Sr Steven N wat Naw Awng tsun ai.
Simsa ai hte mungshawa hpe hkye la ai magam bungli galaw ai ni hpe htawng jahkrat ai ngu ai gaw mungshawa ni a wang lu wang lang ahkaw ahkang hpe grai ahtu hkra shangun ai, ya na zawn n tara ai hku tara jewat ai lam gaw Myen mung a Simsa lam gaw gap ai hta mungshawa ni hpe myit makam yawm wa shangun ai lam re nga nna tsun ai.
Ninghkap n’gun madun ai shawa masha ni kawn Pyendau ni hpai let manau wang kaw nna Myitkyina Muklum tara Rung shawng kaw ninghkap ai lam galaw nhtawm Myitkyina myo ka-ang hku shinggrup nna manau wang de bai wa zup ai re. Lai wa sai Dec. 7 ya shani hta Sr Lum Zawng , Sr Zau Jat, Srn Nang Pu ni hpe Myen Asuya tara rung kawn n tara ai hku htawng dam jahkrat ai hpe n ra sharawng ai majaw ya na zawn mung shawa ni n’gun madun wa ai re lam n’gun madun lamang hta mung chying mungshawa mun mi hkawt sa du shang lawm ai lam chye lu ai.
