Myen Mung hte seng ai Miwa Asuya Dakasa Salang Mr. Hong Liang hte hpung ni marai (10) gaw November (20) ya shani Myitkyina muklum gawknu kaw Jinghpaw Mung Daw Asuya hte hkrum shaga ai lam nga ai hpe chye lu ai.
Jinghpaw mung kaw wa du ai lam gaw “hpyen yen mungshawa ni hpe garum ntum wa jaw ai lam san san sha re” nga nna Jinghpaw mungdaw hkringmang Daju Dr Hkyet Awng tsun ai.
Miwa Dat Kasa Salang ni sa du ai shaloi Jan Mai Kawng hpyenyen Dabang kaw mung sa du gawan ai rai nna, kade nna yang Myitkyina Nam Jim kaw galaw sa wa na Jak Rung masing hta hpyenyen mungshawa ni hpe bungli lu jaw wa na re lam, tsun jahta da ai nga nna Dabang Lithkam tsun ai.
Miwa Dak Kasa Salang hpung ni gaw Man Hkring Lisu Jahkrai Ma Boder de sa du gawan gatsan ai lam galaw nna Mali Nmai Hka madim gaw gap ai shara de mung sa du gawan nhtawm shana maga Myitkyina kawn bai pru hkawm ai lam nga ai hpe chye lu ai.
Ya na zawn Miwa Asuya Dak Kasa Slg hpung ni wa du gawan ai lam gaw Mali Nmai Hka Madim Gaw Gap masing hpe matut galaw na lam nga ai majaw madung sadu ai re nga nna Kachin Deploment Net Working Group kaw na Sara Steven shi a ningmu hpe tsun ai.
Ndai Miwa Asuya Dat Kasa Salang Mr Hong Liang Hpung ni gaw lai wa sai shaning hta mung Myitkyina kaw sa du ai lam nga ai rai nna dai aten hta Mung shawa ni kaw shanhte manam ai Plam Sping Hotel shawng kaw hku Hka Madim Masing hpe dawm kau na matu shawa n gun madun ai lam mung nga lai wa sai re.
