Laiza Muklum kata de du shang wa ai hkrunlam hkawm masha ni hpe Mai Sak Pa hkamja lam jep chyoi dabang kaw nhtoi 14 ya hkamja lam masam maram (Quarantine) galaw ai masha ni marai 21 nga ai hta na marai 5 gaw hkamja lam jep chyoi hkam la ai nhtoi hpring sai majaw wa shangun sai lam chye lu ai.
Hkamja lam jep chyoi hkam la ngut sai Mung masha ni marai 5 gaw, Woi Chyai hpyen yen dabang lawk 3 kaw na re. Laklai lam hpa nnga ai majaw dabang kaw na tara shang hkamja lam madi shadaw laika jaw nna tinang nga ai dum nta de wa shangun sai re” nga nna Mai Sak Pa Check Point Dabang Up Salang Seng Li tsun ai.
Ya aten Mai Sak Pa hkamja lam jep chyoi dabang kaw hka mayak nga ai re hte Covid-19 Ana Zinli Makawp Ninghkap Komiti kaw nna Quarantine hkamla ai masha ni hte ra mara garum madi shadaw ya nga ai ramma ni hpe lusha manu lani mi hta marai langai mi hpe Miwa gumhpraw Yuan 10 jahkrat ya ai re hpe mung chye lu ai.
Htoi Gender uhpung ni kaw nna Jinghpaw Mung kata nga ai Quarantine tawn ai shara ni hta Covid-19 ana zinli makawp ninghkap na matu hkyak hkyak ra nga ai Lata kashin sapbya, N-gup magap, Handgel, Ana makawp tsi, tsi gat pung hte malu masha ni hpe garum jaw ai rai nna ana zinli hpe makawp ninghkap na lam hte seng ai hpaji jaw laika pa garan jaw lam galaw nga ai hpe chye lu ai.
Jinghpaw Mung kata na hpyen yen ni, grau nna yak nga ai mare kahtawng ni hte KIO up hkang ginra rai nga ai Laiza, Mai Ja Yang ni de mung matut nna sa du garum jaw na matu hkyen lajang da ai lam ni nga ai re hpe mung chye lu ai.
