Wunpawng Mungdan Shanglawt Hpung Ginjaw Komiti tingnyang up a (60) ning hpring KIO masat ning htoi mungga madat hkam la hpawng hpe Oct (25) ya jahpawt hkying 8:00 AM aten hta Padang Hkrun Lam Majan Masing Woi Awn rung gawk nu kaw galaw la lu sai re.
Hpawng hta Wunpawng Mungdan Shanglawt Hpung Ginjaw Komiti, Ninggawn Amu Madu Salang Kaba Kumhtat Htin Nan kaw nna KIO Ginjaw Komiti Tingnyang Up Du Daju Jum Nban La a (60) ning hpring Wunpawng Mungdan Shanglawt Hpung Masat nhtoi mungga hti shalai ya ai hta, KIO gaw Wunpawng mungdan masha ni a myithkrum gahkyin gumdin ai, mungshawa yawng hpe lam woi awn ai, mungshawa gawng malai tai ai hte (60) ning laman galaw ra ai bungli ninggam hte ninggam hpe ram ging ai madang du hkra lit la gunhpai sai. mungsha ni KIO magam gun ni yawng shanglawt ai mungdan ra marit ai myit masin hte kaning re ai yakhkak jam jau ai ten raitim myit marai n shayawm ai sha apnawng shakut gunhpai ai majaw KIO gaw mungkan mung masa pinra ntsa e sari sadang nga nga hte hkawm sa lu ai lam mungga hta shalawm da ai re.
Wunpawng amyusha ni a kata myithkrum gahkyin gumdin lam n-gun yawm wa ai, wunpawng amyusha ni hta myit masa daw hka n-gun ga garan shangun ai nsam kumla ni grai bai byin pru wa ai, shanglawt rawt malan mung masa magam bungli a ntsa myit makam yawm wa ai, rawt malan myit jasat gaw raw wa ai hte kaga uhpung uphpawng ni hpe kamhpa ai lam ni dan dawng wa ai. ndai zawn re ai mabyin sat lawat ni gaw mungdan gawpgap bungli hpe lagaw gang dingbai dingna byin shangun nga ai lam hpe mung shalawm da ai re.
Mungkan a byin da masa hta hkan nna tinang mungshawa ni nan gawgap sa wa lu na ginjang kaja ahkaw ahkang kaba anhte a man e du nga ai. Ndai ahkaw ahkang ginjang kaja hpe shalai tat sum kau ai lam, nbyin hkra myit hkrum n-gun gaw ahkyak madung rai nga ai lam dip da hkrum ai amyu sha ni tinang amyu hpe shalawt dat lu na matu shakut nga ai rawt malan lam yan gaw teng man ai, manu dan namnak rawng ai magam bungli re lam, wunpawng mungdan shanglawt hpung gaw ndai kaba dik ai magam bungli hpe shaning ladaw (60) ning du hkra rawt malan mung masa lam yan n yit n hprai ai sha, shakut shaja gun hpai let mungdan langai hta nga ra ai hkrang hpawn hpe gaw gap shachyaw nga sai re hte ya aten mung kan ting hkrit tsang nga ai Covid-19 virus anan zinli mung tinang ginra hta ndu shang wa hkra KIO Covid-19 ana zinli makawp ninghkap komiti kaw nna masat jahkrat dat ai tara ni hpe mung tup hkrat hkan sa shajang ga nga nna KIO Tingnyang Up a mungga hta lawm ai re.
Ginjaw Komiti Tingnyang Up malai Du Daju Jum, Gunhtang Gam Shawng kaw nna mung Wunpawng mungdan shanglawt hpung Ginjaw Komiti tingnyang Up Du Daju Jum Nban La a (60) ning hpring wunpawng mungdan shanglawt hpung masat ninghtoi num htet shatsam mungga hpe mahta nna wunpawng amyu sha ni dip da hkrum ai kaw nna awmdawm ai hpun da de du lu na matu KIO gaw mungshawa yawnga a gawng malai tai ai, woi ningbaw ai re nga nna tsun sang lang dan ai.
60 ning hpring KIO masat nhtoi mungga madat hkamla hpawng lamang hpe ya aten Covid 19 ana zinli kap bra taw nga ai aten ladaw re majaw lamang hpe Ana makawp ninghkap tara hte maren galaw ai rai nna KIO masat nhtoi mungga hkam la hpawng hta KIO Ginjaw Komiti Salang ni Wunpawng Mungdan Shanglawt Amyu Shayi hpung ni sa du shang lawm ai rai nna mung shawa, Dap shawa ni hpe mung laiza TV, Laiza fm kaw nna mungga htawn shalai ya ai lam galaw ai re.
