KIA Masat (1) Dap Ba, Masat (4) Dap Dung ginra de May (12) ya shani hkying 12:00 PM daram kawn Myen hpyen jet n bungli ni hte matut manoi naw wa gap gasat nga ai lam chye lu ai. Lai wa sai May 9 ya shani kaw nna Myen hpyen hpung ni KIA Masat (4) Dap Dung de laja lana htu shadut lung wa ai majaw KIA hpyen hpung ni hte matut manoi gasat gala byin nga ai rai nna Deng (17) maga de nga ai Myen hpyen hpung ni gasat gala byin ai shara mayan de laknak kaba matut manoi gap bang ai sha n-ga Wura Hkindaw Post de mung May (11) ya shani hkying (2:15)Pm daram hta Myen Hpyen jet nbungli (2) hte bom (4) lang wa jahkrat bun ai hte may 12 ya shani hta gaw 120 MM hte matut manoi gap bun ai lam shawng lam shi sawk ni shana wa ai kaw na chye lu ai.
KIA masat (1) Dap Ba Daju kaw mung May (12) ya shani hkying (11:45)PM aten daram hta Myen hpyen jet n bungli wa gap gasat ai rai nna KIA masat (7) Dap Dung ginra Bawm Wang mare jawng kawng kaw mung n bungli bawm wa jahkrat bun ai lam na chye lu ai.
KIA Masat (2) Dap Ba, Masat (20) Dap Dung ginra, Jala Hkyet hte Wu Loi Bai lapran Woi Ju de sa wa ai lam num she kaw May (11) ya shani hkying (2:40)Pm daram hta KIA hpyen hpung ni hte dai ginra de htu shadut lung wa ai Myen hpyen hpung ni gasat gala byin ai hpang Myen hpyen n-gun (50) daram Gauri Bum pawt maga de bai shamu shamawt shang wa ai majaw numdaw kalang bai gasat gala byin ai lam na chye lu ai.
KIA Masat (6) Dap Ba, Masat (36) Dap dung ginra Muse Bang Hkam hte Muse lapran na Mungbaw hka mahkrai Pan Se P.T.Ts ni a dap hpe May (12) ya jahpawt manap hkying (4:00)Am daram hta TNLA Dap ni sa htim gasat ai kawn gasat gala byin ai rai nna Nam Hkam Ze Len mare baw Seng Chyaw Myen hpyen dap hpe mung TNLA ni sa htim gap ai sha n-ga Nam Hkam Nmau hka makau Tit Kong Sahkan hpe mung TNLA ni sa htim gap ai kawn gasat gala byin ai lam na chye lu ai, ndai gasat gala majan hta masha kade daram si hkala hkrum mat ai hpe naw matut sagawn nga ai lam buga masha ni shana wa ai.
KIA Masat (7) Dap Ba, Masat (33) Dap Dung ginra de May (11) ya jahpawt manap kaw nna Myen hpyen hpung ni laknak kaba gap bang ai majaw jahpawt hkying (8:00)Am aten daram kaw nna KIA hpyen hpung ni mung laknak kaba ni hte bai nhtang gap ai lam chye lu ai.
KIA Masat (33) Dap Dung ginra de lai wa ai May (9) ya shani kaw nna Myen Hpyen Dap Dap Nu (33) kata na hpyen hpung ni Sati Chyaw (စတီးေၾကာ) kawn Lagwi maga lai shang wa ai Myen hpyen hpung ni hpe KIA hpyen hpung ni hkap shingla gasat dat ai hpang Myen hpyen hpung ni May (9) ya shani KIA Masat (33) Dap Dung ginra de laknak kaba (14) lang daram gap bun ai majaw Hpare hpyen yen dabang na Mung shawa htinggaw (20) jan Miwa Mungdan, Kau Lung Pa mare de sa hprawng nga mat ai hpe Miwa Asuya kawn lawan bai nhtang wa na matu tsun wa ai lam nga ai hpe chye lu ai.
KIA Masat (9) Dap Ba, Masat (6) Dap Dung ginra Woi Maw Pou maga hku htu shadut lung wa ai Myen Hpyen Hpung ni hpe May (11) ya shani hkying (2:40)Pm daram hta KIA hpyen hpung ni hkap shingla gasat dat ai kawn gasat gala byin ai lam na chye lu ai.
