KIA Masat (9) Dap dung ginra, Hau paw hte Wing Nang mare lapran Npaw hka makau kanoi sun kaw hpaw da ai ka-ni dut dabang hpe KIA masat (9) Dap dung, Bum Pri Bum kata na magam gun ni November 21 ya shani sa rim kau ai lam na chye lu ai.
Ka-ni dut dabang hpe sa rim ai hta masha marai 15 hpe lu rim ai hta, marai 3 gaw dut ai masha, marai 12 gaw ka-ni lu sha ai masha ni rai nna, dai masha ni hte rau ka-ni arung arai hte kaga arung arai law law hte hpawn lu rim ai lam shang lawm ai Salang langai tsun ai.
Dai dabang hpe kadai ni hpaw da ai re hpe n chye lu ai raitim Myen Asuya ni ahkaw ahkang jaw da na masa nga ai lam magam gun langai tsun ai.
Lu rim ai masha ni gaw wunpawng amyu sha la langai hte Miwa, Sam amyu sha ni re, November 22 ya shani tara rung shapraw ai lam galaw ai rai nna KIC a tara aming hte maren ahkyak la dawdan sa wa na re lam chye lu ai.
