Sam Mung dingdung daw, Nam San Myo, Hu Lat mare na yi sa lam lapran kaw, November (2) ya jahpawt daw hkying 8:45 Am aten hta hpawmi marai (2) gaw lakrang Nai sa tam ai shaloi hkam bawm kabye kapaw la ai lam na chye lu ai.
Nam San myo, Hu Lat mare sinna maga deng mi ram tsan ai shara hta mung mare masha ni dingyang hkawm lai nga ai lam braw nkau kaw Jan A Le Ma Asak (60) ning gaw lahkra lata lahpum, lahkra lagaw ndung hte lapai lagaw kaw hkra hkala hkrum ai rai nna, Jan A Wu Me Asak (65) ning gaw lahkra lapawp, lahkra magyi, lahkra lata lahpum, lapai magyi ni hta hkra hkala hkrum ai majaw tsang ra ai madang du nga ai lam na chye lu ai.
Ya aten hkala hkrum ai hpawmi (2) hpe Hu Lat mare Salang hte Nam San Myo uphkang Salang ni kawn Nam San tsi rung de sa sa da ai hta Jan A Wu Me gaw ningma grai sawng ai majaw Lasho tsi rung kaba de matut tsi tsi hkam la na matu shalai dat sai lam na chye lu ai.
