Myen hpyen Dap ni pat hkum tawn da ai majaw majan lapran chyat rawng nga ai hpyen yen mung shawa ni lawt pru wa lu na matu April (30) ya shani kaw nna Myitkyina muklum kaw n-gun madun ai Ramma ni hpe myen asuya ni kawn lam amyu myu hku hkum pat shatsang ai raitim ramma marai hkying mi daram gaw May praw (4) ya jahapwt du hkra Asuya Hkringmang Rung mawdaw lam shawng kaw yup sha let si mani ai ladat hte n-gun madun ai lam galaw lai wa sai re hpe na chye lu ai.
May (3) ya shana daw hta Jinghpaw Mung Hkringmang Daju kawn ramma ni hte sa hkrum na lam tsun ai raitim nsa wa ai majaw nawku hpung shagu na hpung woi ni, ramma nkau ni hte PCG ni kawn Jinghpaw Mung Hkringmang Daju hpang de sa du bawng ban ai lam nga ai re hpe na chye lu ai.
Bawng ban ai hta asuya maga na Jinghpaw Mung Hkringmang Daju Salang Hkyet Awng hte asuya salang ni rau hkrum zup bawng ban ai re ramma ni kawn ramma ni ra sharawng ai lam hpe tang madun ai raitim ramma ni san ai ga san hpe nau ntsun sanglang dan ai sha Asuya Mung ramma ni hte maren pat hkum da ai mungshawa ni lawt pru wa na hpe yaw shada ai re , Jinghpaw Mungdaw kaw garum gahtau komiti ni hpaw shabawn da ai re majaw ramma ni n-gun madun ai lam hpe gan jahkring tawn da na matu hkringmang daju kawn tsun wa ai raitim ramma ni gaw hkam daga nga yang she
hkap la na ngu tsun ai majaw Asuya maga kawn laika langai shale jaw wa ai hta asuya kawn shan hte garum lai wa ai sumtang hte byin mai ai daram hpyen yen ni hpe garum na lam sha ka tawn da nna ta tut hta gara hku garum ningtum sa wa na lam hpa hkam dahka n nga majaw ramma ni n hkap la ya ai re lam zuphpawng hta shang lawm ai Saranum Sut Seng Htoi kawn ya na zawn tsun ai kaw na chye lu ai.
Asuya kawn shale ya ai laika hpe ramma ni n lu hkap la ya ai raitim May (4) ya shani Lai Nawng Hku hpyen yen mung shawa marai (160) jan hpe Jinghpaw mung Asuya ni woi awn nna PCG ni, Nawku hpung ni, Ramma gawng malai ni hte Media hpung ni lawm nna hpyen yen mung shawa ni hpe hkying (1:00) Pm kawn sa tau ai raitim myen hpyen Dap ni gaw Maran kahtawng Gate kaw jahkring da nna shana daw hkying (3:15) pm daram hta she bai lai shangun ai lam na chye lu ai.
n-gun madun ai ramma ni mung n-gun madun dabang kaw nna Manau wang de htawt sit ya let hpyen yen mung shawa ni lawt pru wa na hpe la dingda nga ma ai lam Myu Sha Pyen U shana wa ai kaw na chye lu ai.
