Majan lapran chyat rawng nga ai hpyen yen Mung shawa ni shimlum ai shara de lawt pru wa lu na matu ramma ni kawn Myitkyina Masat (1) lahta tsang jawng kaw simsa ai ladat hte n-gun madun na matu hkyen lajang da ai hpe MyenAsuya Balik ni pat hkum kau ya ai majaw ramma ni Shata Pru Manau Wang kaw sha n-gun madun ai lamang ni hpe matut galaw sa wa ai lam chye lu ai.
May (2) ya shani galaw ai ramma ni a n-gun madun ai lamang hta Sara Jan Hkawn kaw na ramma ni hpe n-gun jaw shatsam mungga jaw ya ai. SaraTang Gun kaw na ka-ni nanghpam pat jasan lam hte seng nna ningmu jahpaw ya ai lam, Sha-It kaw na Sara Nlum Naw Ja kawn shinggyim ahkaw ahkang hte seng ai lam hpe ningmu jahapw tsun sanglang n htawm Shing-Nip kaw na Tara Kasa Hkun Nawng kawn ramma ni chye da ging ai tara upadi ni hpe tsun sang lang ai lam galaw ai hpe chye lu ai.
Shana hkying 7:00 Pm kaw na gaw n-gun madun ai ramma ni kawn tinang n ra sharawng hkrit tsang ai lam ni hpe nlung kaw ka nna kabai kau na lam, maisau kaw ka nna nat kau na lam ni galaw sa wa na re nga nna Sara num Sut Seng Htoi tsun ai.
May (3) ya shani hta gaw ramma ni kawn Masat (1) lahta tsang jawng hte Masat (9) lam lapran kaw dung nna n-gun madun sa wa na re hpe chye lu ai.Laiwa sai ten hta ahkaw ahkang ni jaw nna kaja wa galaw na ten ahkaw ahkang dawm kau ya ai raitim ramma ni gaw myit n daw ai sha matut manoi n-gun madun sa wa na re hpe Myu Sha Pyen u shiga jaw la ai kaw chye lu ai.
April 27 ya shani hta Kachin Lawyers Group hte Shingnip (Kachin Legal Aid Network Group) ni kawn Mungdan Gumsan magam hpang de Jinghpaw mung kata na hpyen yen masa hte majan lapran chyat rawng nga ai Mung shawa ni hte seng nna tang madun ai lam mung galaw lai wa sai re.
