Hpakant Nay Min Kaba Company kaw sin nga ai myen hpyen la ni kawn lai wa sai Oct 31 ya shani sinat gapbun ai majaw hkala hkrum mat ai Ye mase tam masha marai 6 a amu manghkang hpe lai wa sai Nov 27 ya shani hparan ngut sai lam na chye lu ai.
Company kawn hkala hkrum ai masha marai 6 kaw na marai 4 gaw nau nsawng ai re majaw gumhpraw Kys seng 15 wa ai hte loi sawng ai marai 2 hpe gaw Kyt sen 30 hte tsi tsi hkam la manu jaw dat sai re hte ya aten hkala hkrum ai masha ni gaw mai tsai wa nna dum nta buga de wa sai lam na chye lu ai.
Company kaw ndai zawn manghkang jahkring hkring byin ai gaw Hpyen la ni kawn galoi mung mai dang sha ai ngu ai masa re lam Myu Sha Zinlum hpung na Sr Dashi Naw Lawn kawn ya na zawn tsun dan ai.
“Ye Mase tam masha ni hpe gap hkala da nna galoi gara aten raitim shanhte mai dang sha ai ngu hku ang wa ai re majaw lung seng tam masha ni mung Company hpe wan na jahten kau ai lam mung nga lai wa sai re. Ye mase tam masha ni kawn Myu Sha Zinlum Hpung ni hpang de garum hpyi wa rai nna hparan ya ai ga re”
Company kaw sin nga ai hpyen dap, hpyen la ni hpe tinang Companyy ni nan lit la ra ai Myen Myu Sha Zinlum hpung kawn tsun sadi jaw da sai lam, ya aten hpakant maw ginra ni hta htawt sit bungli masha ni law wa ai sha n-ga tam lu tam sha mung yak masha gaw law wa rai nna ndai zawn manghkang ni jahkring hkring byin nga ai re hpe Myu sha zinlum hpung ni tsun ai kaw na chye lu ai.
