KIA Masat (2) Dap Ba de Myen Hpyen Dap ni kawn April (11) ya shani kaw nna htu shadut majan baw ai hte Mung mare ni nga ai Mare de Laknak kaba ni gap sharu bun ai majaw Awng Lawt mare makau grup yin Na mung mare ni gaw Kadai mung kadai chye ai hku nam de hprawng koi yen ra mat ai re hpe chye lu ai.
Hpyen koi yen hkawm ai hta malu masha ni nlawm na hkum Kaman koi yen hkawm ai Mung mare masha ni mung law nga ai re, Majan gaw lani hte lani grau grau sawng wa ai re majaw Mung mare masha ni gaw gahtap hprawng yen ra mat nna Matut mahkai Phone line pyi n nga ai de hprawng yen hkawm ra mat ai re. Ya aten du hkra Nam de hprawng yen hkawm ai hpyen yen Mung masha ni hte matut mahkai mung nlu ai lam buga masha ni shana wa ai.
Hpyen Yen Mung Shawa 2000 jan gaw majan lapran naw chyat rawng nga ai re hpe chye lu ai. Hpyen yen Mung shawa ni shimlum ai shara de lawan lawt pru wa lu na hte shinggyim garum ningtum jaw ya lu na matu Danai pawnghpawm Nawku hpung hte buga Myit su salang ni , shinggyim U hpung U hpawng ni kawn April 14 ya shani Mungdaw Asuya de laika tang shawn lai wa sai raitim ya aten du hkra hpa mahtai n lu shi ai re lam buga masha ni tsun ai. Hpyen yen Mung shawa ni hpe majan lapran pat shingdang da ai gaw Mung shawa ni hpe pala shinggang shatai ai masa re nga nna Mung masa hpyen masa maram masam nga ai ni tsun ai.
Hpyen yen mung shawa ni hta Ma Kaji, Gum gai dingla ni, Ma hkum kanu ni law ai sha n-ga machyi makaw sawng ai ni mung nga ai hte malu masha tsi mawan ni yak hkak jam jau nga ai lam na chye lu ai. Hpyen yen Mmung shawa ni Nam kaw chyat rawng nga ai gaw daini du hkra rai yang N htoi 20 jan ya rai wa sai re. Myen Hpyen Dap ni kawn April 11 ya shani kaw nna hkang zing tawn da ai Lai Nawng Hku mare masha marai (160) mung ya aten du hkra naw hkang zing da hkrum ai majaw hpyen yen Mung shawa ni shimlum ai shara de lawan lawt pru wa lu na matu April 30 ya shani kaw nna Myitkyina kaw Ramma ni n-gun madun ai lam galaw nga aire hte shinggyim uhpung uhpawng law law kaw nna Myen Asuya hpang de laika tang shawn da ai lam nga ai raitim ya aten du hkra Majan lapran chyat rawng nga ai Hpyen yen Mung shawa ni pru wa lu na matu shinggyim garum ningtum jaw lu na matu hpa mahtai nlu shi ai re hpe chye lu ai.
