Sinpraw Ginwang Ginjaw, KIA Masat (3) Dap Ba Wara Bum kaw magam gun lai wa sai magam gun dingsa ni hte ya yang KIA Masat (3) Dap Ba Wa Ra Bum kaw magam gun nga ai magam gun ni a hkrumzup hpawng hte wunli la chyeju shakan hpawng hpe Dec.15ya shani galaw la lu sai lam chye lu ai.
Ya na zawn wunli la chyeju shakawn hpawng galaw ai gaw lai sai ten hta KIA Masat (3) Dap Ba Wara Bum kaw magam gun lai wa sai Hkrisatan Hpung Komiti hte Ginlung Ramma ni galaw da ai Nu Mariya Lungpu AD.2000 ning hte kyu hpyi gawk ni hpe myit dum let magam gun lai wa sai magam gun Usa ni hte ya yang ta tut mungdan magam gunhpai nga ai share ninghkring ni yawng karai kasang hpe galoi mung myit dum nna mungdan magam hta grau shanglawm shakut shaja lu na matu yaw shada let, ndai kyu hpyi hpawng galaw ai lam na chye lu ai.
Wunli la chyeju shakawn hpawng galaw ai hta lai wa sai 1992 shaning hta Wa Ra Bum sindai hkristan ginlung ramma hpung hpe woi awn lai wa ai KIC ningbaw Malai II Dkb Zawngbuk Htan hpe mung wara bum sindai hpung ni kawn chyeju dum masat masa hku nna soi nhpye hte gumhpraw n-gang kumhpa shagrau ai hte ning-rum ningtau jan wunpawng mungdan shanglawt asuya ginjaw amyu shayi hpung ningbaw Usa hpawmi hpaure hkawn ja hpe mung chyeju dum kumhpa shagrau ai lam ni galaw ai hpe chye lu ai.
Wunli la chyeju shakawn hpawng garai nhpang yang jahpawt hkying 7:00 Am aten hta Magam gun dingsa ni hte Wara Bum kaw ta tut magam gun nga ai magam gun ni Marai (33) hkrum zup nna lai sai ten gaw gap da lu ai Nu Maria lungpu hte kyu hpyi gawk ni hpe grau nna tsawm htap wa lu hkra alu tam lamang ni galaw na hte nam pu nampan hkai shatut ai lam ni galaw sa na matu mung bawng ban la lu sai lam chye lu ai.
Wunli la chyeju shakawn hpawng hta KIC. Ningbaw malai II hte rau Laiza, Maija Yang, Nhkawg Pa hkan na magam gun ni yawng marai 200 daram sa du shanglawm ai sha n-ga wunli la chyeju shakawn hpawng hpe lahkawng ning hta kalang galaw sa wa na re hpe mung chye lu ai.
